Ифтитоҳи мактаби наву замонавӣ дар Зафаробод

Душанбе, 17 август. (АМИТ «Ховар», Бекназари Абӯбакр). — Дар доираи даври навбатии мулоқоту вохӯриҳо 16 август раиси вилояти Суғд Қоҳир Расулзода дар хоҷагии деҳқонии «Бахт»-и ноҳияи Зафаробод бо мардуми ноҳия мулоқот намуд. Аз хадамоти матбуоти раиси вилояти Суғд ба АМИТ «Ховар» хабар доданд, ки Қ. Расулзода пеш аз мулоқот дар маросими ифтитоҳи бинои тозабунёди мактаби таҳсилоти умумии рақами 7-и деҳаи Қипчоқи ноҳия ширкат варзид. Сохтмони ин мактаби тозабунёд бо маблағгузории буҷаи давлатӣ соли 2009 оғоз гардида, барои таҳсили 240 нафар хонандагон пешбинӣ гардидааст. Ин иншооти хуштарҳу замонавӣ дорои 7 синфхона, як синфи компютерӣ, 2 ҳуҷраи муаллимон аст. Дар қисмати дуввуми мулоқот сокинони ноҳия ба раиси вилоят бо арзу дархост ва шикоятҳояшон муроҷиат намуданд.