Таъсиси ҳайати тиҷоратии Афғонистон дар Тоҷикистон

Душанбе, 22 август. (АМИТ «Ховар», Покиза Маҳмадбекова). – Муовини раиси Палатаи савдо ва саноати Ҷумҳурии Тоҷикистон Асаналӣ Карамалиев бо сардори раёсати нерӯгоҳи бодии Палатаи савдо ва саноати шаҳри Қундузи Афғонистон Аҳмад Форуқ мулоқот намуд.  Аҳмад Форуқ дар бораи фаъолияти созмонаш маълумот дода гуфт, ки онҳо мехоҳанд дар Тоҷикистон барои рушди муносибатҳои иқтисодиву тиҷоратӣ, чустуҷӯи шарикони ҳамкорӣ ва таҳлили вазъи бозор ҳайати тиҷоратӣ таъсис диҳанд. А. Карамалиев пешниҳоди ӯро маъқул шумурда зикр намуд, ки Палатаи савдо ва саноати ҶТ баҳри ташкили мулоқоти кории Тоҷикистону Афғонистон барои дарёфти шарикони ҳамкорӣ дар чаҳорчӯби қонунгузории ҶТ мусоидат менамояд. Ӯ ҳамчунин ба ширкатҳо ва соҳибкорони Қундуз пешниҳод намуд, ки дар намоишгоҳҳои баргузор менамудаи Палатаи савдо ва саноати Тоҷикистон ширкати фаъол намоянд.