Боздиди раиси вилояти Суғд аз «Кохи матбуот»

Душанбе, 24 октябр. (АМИТ «Ховар», Покиза Маҳмадбекова). — Раиси вилояти Суғд Қоҳир Расулзода бо мақсади шиносоӣ бо фаъолияти журналистони вилоят аз «Кохи матбуот»- и вилоят боздид намуд. Ба мухбири АМИТ «Ховар» аз Хадамоти матбуотии раиси вилояти Суғд иттилоъ доданд, ки Қ. Расулзода дар ин бинои мӯҳташам бо ҳайати эҷодии рӯзномаҳои «Ҳақиқати Суғд», «Согдийская правда», «Суғд ҳақиқати», «Варорӯд», «Тирози ҷаҳон» ва бо дигар рӯзноманигорон сӯҳбати самимӣ анҷом дод. Қоҳир Расулзода зимни сӯҳбат, аз ҷумла гуфт, ки бо шарофати истиқлолияти давлатии кишвар ва бо дастгирии Президенти Ҷумҳурии Тоҷикистон Эмомалӣ Раҳмон бинои «Кохи матбуот» бунёд гардида ва он  боиси ифтихору сарбаландист.Зикр бояд намуд, ки рӯзноманигорони нашрияҳои вилоятӣ солиёни тӯлонӣ дар биноҳои ноободу шароити номувофиқ кору эҷод мекарданд. — Бовар дорам, ки журналистон минбаъд дар утоқҳои кории барҳавову замонавӣ ва муҷаҳҳаз бо техникаи муосир баҳри инъикоси ҳаёти сиёсиву иқтисодӣ, иҷтимоиву фарҳангии кишвар беш аз пеш саҳм мегиранд, — гуфт раиси вилоят дар хотимаи мулоқот бо намояндагони ВАО.