Даъвати Ҳ.Зарифӣ

Душанбе, 12 октябр. (АМИТ «Ховар»,  Пайрав  Назаров). – Вазири  корҳои  хориҷии Ҷумҳурии  Тоҷикистон  Ҳамрохон  Зарифӣ  дар  иҷлосияи   даҳуми  Шӯрои  вазирони   корҳои  хориҷии  кишварҳои аъзои Муколамаи  осиёии  ҳамкорӣ  суханронӣ  кард. Тавре   ба  АМИТ «Ховар»  дар  Раёсати  иттилоот,  матбуот,  таҳлил ва  тарҳрезии  сиёсати  хориҷии  Вазорати  корҳои  хориҷии  Ҷумҳурии  Тоҷикистон  иттилоъ  доданд,  роҳбари ВКХ  Тоҷикистон  зимни  суханрониаш,  аз  ҷумла,  таъсири  бӯҳрони  молиявӣ  ба  иқтисодиёти  ҷаҳон  ва  роҳҳои  баромадан  аз он, имконияти   сармоягузорӣ ва  истифодаи  захираҳои табиӣ ба  нафъи   кишварҳои  Осиёро  зикр  намуда,  ҳамчунин  таваҷҷӯҳи  ҳозиронро  ба  масоили  технологияҳои  иттилоотӣ,  нақлиёт  ва  муҳити  зист  ҷалб  кард.Дар  ҷараёни  машварат  ҷониби  Кувайт  пешниҳод  намуд, ки соли  2012  Ҳамоиши  кишварҳои Осиё  доир  карда  шавад, ки  дар  он  иштирокдорон  метавонанд,  проблемаҳои  мухталифи  кишварҳои  минтақаро   мавриди  муҳокима  қарор  диҳанд.Ҳамрохон  Зарифӣ  дар  хотимаи  суханрониаш  кишварҳои иштироккунандаро  ба  мулоқоти  11 – уми вазирони  корҳои  хориҷии  Муколамаи  осиёии  ҳамкорӣ  даъват  намуд, ки  он  бояд  соли  2012  дар  шаҳри  Душанбе  баргузор  гардад.