Камшавии саршумори моли майда дар навоҳии Суғд

Душанбе, 12 октябр. (АМИТ «Ховар», Мавҷуда Анварӣ). – Мутахассисон соҳаи чорводории вилояти Суғд  ҷиҳати рушди соҳа ва афзун намудани ҳаҷми истеҳсоли маҳсулоти  шириву гӯштӣ корҳои назаррасро ба сомон расониданд.Дар ҳамаи шаклҳои хоҷагидорӣ нисбат ба ҳамин давраи соли гузашта саршумори чорвои калон 6763 сар зиёд гардид. Тавре  ба АМИТ «Ховар» аз Сарраёсати кишоварзии вилояти Суғд иттилоъ доданд, дар корхонаҳои кишоварзию хоҷагиҳои деҳқонӣ вазъият ташвишовар буда, саршумори гӯсфанду буз нисбат ба соли 2010-ум 6065 сар кам шуд. Камшавии саршумор асосан аз ҳисоби ноҳияҳои Ашт (7768 сар), Ғончӣ (135 сар) ва Кӯҳистони Мастчоҳ  (157 сар) ба миён омадааст. Истеҳсоли маҳсулоти соҳаи чорводорӣ дар ҳамаи шаклҳои хоҷагидорӣ нисбат ба ҳамин давраи соли гузашта афзоиш ёфта, истеҳсоли гӯшт баробари 102,2 фоиз, шир 101 фоиз, пашм 105,5 фоиз ва тухм 124,2 фоиз таъмин гардид.