Намоишгоҳи «Инфрасохтори Тоҷикистон – 2011»

Душанбе, 28 октябр. (АМИТ «Ховар»,  Покиза  Маҳмадбекова ). –  27  октябр  дар  шаҳри  Душанбе  беш  аз 50  ширкати   15 кишвари  ҷаҳон  маҳсулоти  худро  дар  намоишгоҳи  байналмилалии «Инфрасохтори  Тоҷикистон – 2011»  ба  маърази  намоиш   гузоштанд. Дар  маросими  расмии ифтитоҳи  намоишгоҳ  раиси Палатаи  савдо  ва  саноати  Ҷумҳурии  Тоҷикистон Шариф  Саид  зикр  намуд, ки  намоишгоҳ  омили  самарабахши  ривоҷи  робитаҳои  тиҷоратию  иқтисодии   кишвари  мо  мебошад. Палатаи  савдо  ва  саноати  Ҷумҳурии  Тоҷикистон  ба рушди  соҳибкорӣ,  ҷалби  сармояҳои  хориҷӣ  ба  иқтисодиёти  кишвар,  рӯйи  кор  овардани  ҳамкории  мутақобилан  муфид  бо  аҳли  тиҷорати  кишварҳои  мухталиф  ва  рушду  густариши  тиҷорат  фаъолона  мадад  мекунад. Ба  гуфти  номбурда, мулоқот  дар  ҷараёни  фаъолияти  намоишгоҳ  заминаи  татбиқи  лоиҳаҳои нави  тақвият  бахшидани   ҳамкории  мутақобилан  муфид  ба  рушди  минбаъдаи  робитаҳоро   фароҳам  меорад.