Чанд хабар аз хориҷи кишвар

Дар соҳилҳои ҷазираи Окинаваи Ҷопон заминларза ба вуқӯъ пайваст, ки қуввааш баробари 6,8 балл буд. Маркази заминларза дар 220 киллометрии соҳили ҷазира ба қайд гирифта шудааст. Аз хусуси талафоти ҷонию молӣ ҳанӯз хабар дода намешавад. ************Бар асари бетартибиҳо дар шаҳри Лаэи Папуа – Гвинеяи Нав камаш шаш кас ҳалок шуда ва 26 нафари дигар захм бардоштааст. Ғоратгарон даҳҳо биноро оташ зада, ҳазорҳо нафар сокинонро аз манзил маҳрум сохтаанд. **************Президенти Никарагуа Даниэл Ортега маротибаи сеюм Президенти кишвар интихоб шуд. Ӯ 62, 6 фоизи овозҳоро ба даст овардааст. Ҳарифи наздиктарини вай Фабио Гадеа 30,9 фоизи овозҳоро касб намудааст. **********Президенти Эрон Маҳмуд Аҳмадинажод хабарҳоро дар бораи ҳамлаи эҳтимолии Исроил ба кишвараш шарҳ дод. Вай бори дигар ҳалокати қарибулвуқӯъро ба давлати яҳудиён ваъда дода, илова намуд, ки Эрон аз ҳамлаи эҳтимолӣ тарсе надорад. **************Дар Итолиё теъдоди ҳалокшудагон бар асари обхезӣ ба 16 нафар расидааст. Дар шаҳрҳои Турин ва Милан мактабҳо баста шуда, ҳазорон нафар сокинон аз эҳтимолан кӯч бастанашон огоҳ гардиданд. 6 ноябр бинобар офати табиӣ дар шаҳри Неапол вохӯрии байни дастаҳои футболи «Наполи» ва «Ювентус» ба вақти дигар мавқуф гузошта шуд.