Сафари кории Шералӣ Хайруллоев ба вилояти Суғд

Душанбе, 9 ноябр. (АМИТ «Ховар», Бекназари Абӯбакр). — Вазири мудофиаи Ҷумҳурии Тоҷикистон генерал-полковник Шералӣ Хайруллоев ба вилояти Суғд cафари корӣ намуда, бо фаъолияти сохторҳои марбутаи вазорат, аз ҷумла ҷузъу томи ҳарбӣ ва ҳолати иҷрои Фармони Президенти Ҷумҳурии Тоҷикистон оид ба даъвати навбатии ҳарбии шаҳрвандон дар вилоят аз наздик шинос гардид. Дар мақомоти иҷроияи ҳокимияти давлатии вилоят вазири мудофиаи ҷумҳурӣ бо раиси вилояти Суғд Қоҳир Расулзода мулоқот намуда, бо иштироки роҳбарони мақомоти вилоятии ҳифзи ҳуқуқ ва сохторҳои низомӣ ва ташкилоту идораҳои дахлдори вилоят ҷаласаи корӣ доир намуд.Шералӣ Хайруллоев натиҷаи омӯзиши гурӯҳи кории Вазорати мудофиаро дар ҷузъу томи ҳудуди гарнизони ҳарбии вилоят мавриди баррасӣ қарор дода, ҳамкории хуби мақомоти иҷроияи ҳокимияти давлатии вилоят ва ҷузъу томи ҳарбиро дар  самти дастгирии моддӣ ва маънавӣ таъкид намуд.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки вазири мудофиаи кишвар ҳамчунин дар ҷаласаи корӣ ба роҳбарони мақомоти вилоятии ҳифзи ҳуқуқ ва сохторҳои низомӣ бобати вусъат бахшидани ҳамкорӣ, мустаҳкам намудани робита бо ҷомеа, роҳ надодан ба қонуншиканиҳо, андешидани тадбирҳои мушаххас ҷиҳати пешгирии фаъолияти ҳизбу ҳаракатҳои ғайриқонунӣ  дастуру супоришҳои мушаххас дод.