Тоҷикистон ба гурӯҳи мамлакатҳои «дорои сатҳи миёнаи рушди инсонӣ» дохил мешавад

Душанбе, 23 ноябр. (АМИТ «Ховар», Мавҷуда Анварӣ). — 22 ноябр бори аввал дар Душанбе Ҳафтаи рушди инсонӣ оғоз гардид.Дар чорчӯбаи Ҳафтаи рушди инсонӣ дар пойтахт вохӯриву мулоқот, муаррифиҳо, маърӯзаҳо, инчунин «мизи мудаввар» бо баррасии дастовардҳои асосии Ҷумҳурии Тоҷикистон дар соҳаи Рушди инсонӣ ба нақша гирифта шудаанд.Дирӯз дар толори маҷлисгоҳи Барномаи рушди СММ муаррифии ҳарсолаи маърӯзаи Барномаи рушди СММ дар мавзӯи «Рушди инсонӣ дар соли 2011» барпо гардид, ки дар кори он намояндагони Вазорати рушди иқтисод ва савдои ҶТ, ташкилотҳои давлатӣ ва байналмилалӣ, сафоратҳо, ташкилотҳои ғайриҳукуматӣ ва ВАО иштирок намуданд.Муаррифӣ бо сухани Ҳамоҳангсози доимии СММ ва Намояндаи доимии Барномаи рушди СММ дар Ҷумҳурии Тоҷикистон Александр Зуев ифтитоҳ шуд. Вай қайд намуд, ки маърӯза «Рушди устувор ва баробарии имкониятҳо: ояндаи беҳтар барои ҳама» унвон дошта, дар он ҳалли таъҷилии масъалаҳои ба рушди устувор алоқаманд ва таъмини баробарии имкониятҳо иникос ёфтаанд, ки онҳоро дар ҳамдастӣ ҳал намудан зарур аст. Дар ҳамаи мамлакатҳои Аврупои Шарқӣ ва Осиёи Марказӣ сатҳи рушди инсонӣ боло рафта, дар ин самт нисбат ба минтақаҳои дигари олами дар ҳолати рушдбуда баробарии нисбатан калон ба даст омадааст ва Тоҷикистону Қирғизистон аз рӯйи Индекси Рушди инсонӣ (ИРИ) ба гурӯҳи мамлакатҳои «дорои сатҳи миёнаи рушди инсонӣ» дохил мешаванд. Имрӯз дар бинои Барномаи рушди СММ бо иштироки коршиносон, намояндагони ВАО ва мутахассисони соҳаи рушди инсонӣ мизи мудаввар барпо мегардад. Дар доираи ҳафта рӯзҳои 24 ва 25 ноябр барои донишҷӯён ва омӯзгорони Донишгоҳи славянии Тоҷикистону Русия, шунавандагони Пажӯҳишгоҳи бозомӯзии ходимони давлатӣ бо иштироки мутахассисони Вазорати рушди иқтисод ва савдо ва дигар коршиносон маърӯзаҳо хонда мешаванд.