2012-2015- солҳои таъмиру барқарорсозии роҳҳо

Душанбе, 23 декабр.(АМИТ «Ховар», Марзия Саидова).- Солҳои 2012 -2015 дар пойтахт «Солҳои таъмиру барқарорсозии роҳҳо ва пиёдаравҳои ҳудуди шаҳраку маҳаллаҳо» эълон гардид. Ин тадбир зимни баргузории иҷлосияи шаҳрӣ бо мақсади ободонии шаҳр ва татбиқи барномаҳои бунёдии инфрасохторӣ андешида шудааст. Дар робита ба ин қисми иҷрои барзиёди воридоти маблағҳо ба буҷаи шаҳрӣ ва буҷаи ноҳияҳои шаҳри Душанбе барои таъмиру таҷдиди роҳҳо сафарбар карда мешавад. Дар ин самт ҷиҳати иҷрои босифати корҳо ташкилотҳои соҳибтаҷрибаи пудратӣ тавассути озмуни кушод ҷалб мегарданд. Дар робита ба татбиқи ин чорабинии муҳими эҳёи инфрасохтории ҳудуди шаҳраку маҳаллаҳо, раиси шаҳри Душанбе Маҳмадсаид Убайдуллоев аз сокинон ва роҳбарони ширкатҳои соҳибмулкони манзил, Шӯрои хонаҳо ва мақомоти худфаъолияти ҷамъиятию соҳибкорон ва роҳбарони субъекти хоҷагидории пойтахт даъват кард, ки дар ин чорабинӣ бо ҳисси баланди масъулиятшиносӣ варзанд.