Дабири кулли Паймони Нерӯ ба Тоҷикистон меояд

Душанбе, 2 декабр. (АМИТ «Ховар», Пайрав Назаров). — 29 ноябри соли 2011 дар шаҳри Софияи Ҷумҳурии Булғористон Конфронси 22-юми Паймони Нерӯ баргузор гардид. Дар ҷараёни кори он номзад аз Словакия Урбан Русак ба ҳайси Дабири кулли нави ин созмони байналмилалӣ интихоб гардид. Дар ҳошияи Конфронси мазкур Сафири Фавқулодда ва Мухтори ҶТ дар Иттиҳоди Аврупо Рустамҷон Солиев бо Дабири кулли нави Паймони Нерӯ Урбан Русак мулоқот намуд. Зимни сӯҳбат Сафири Тоҷикистон аз номи Ҳукумати ҶТ Урбан Русакро бо таъин шудан ба мақоми Дабири кулли Паймони Нерӯ табрик намуд ва дар фаъолияти минбаъдаи ӯ комёбӣ таманно кард. Дипломати тоҷик Урбан Русакро аз номи Ҳукумати кишвар ба Тоҷикистон расман даъват намуд. Дар навбати худ Урбан Русак барои табрики самимӣ изҳори сипос карда, даъвати расмиро бо мамнуният пазируфт.Дар ин бора аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.