Иҷлосияи якуми клуби журналистон дар Суғд

Душанбе, 7 декабр. (АМИТ «Ховар», Лутфия Эшонқулова). – Дар шаҳри Хуҷанд таҳти васояти Ассосиатсияи миллии ВАО мустақили Тоҷикистон иҷлосияи якуми Клуби журналистони вилояти Суғд баргузор гардид. Клуби журналистон иттиҳодияи ғайрирасмии қаламкашон буда, мақсад аз он таҳлили вазъи озодии сухан дар шимоли кишвар, муҳокимаи вазъият ва тарҳрезии тавсияҳо ҷиҳати беҳдошти сифати журналистика мебошад. Раиси Ассосиатсияи миллии ВАО мустақили Тоҷикистон Нуриддин Қаршибоев зимни суханрониаш иброз дошт, ки клуб ташкилоти мустақили иҷтимоии журналистон буда, дар асоси фаъолияти корпоративӣ амал мекунад. Ҷаласаи навбатии клуби журналистон дар оғози моҳи январи соли 2012 баргузор гардида, дар он ҷиҳатҳои ҳуқуқию ахлоқии фаъолияти журналистӣ мавриди муҳокима қарор мегиранд.