Изҳороти Қӯшунҳои сарҳадии Тоҷикистон

Душанбе, 9 декабр. (АМИТ «Ховар»). – Дар баъзе сомонаҳои Интернет мақолае таҳти унвони «Сарҳадбони асосии Тоҷикистон аз сарҳадбонони Русия розӣ нест» пайдо гардид. Дар он хабар дода мешавад, ки гӯё Фармондеҳи Қӯшунҳои сарҳадии КДАМ ҶТ гуфта бошад, ки дастгоҳи машваратии Хадамоти сарҳадии ХФА Русия вазифаҳои ба зиммааш гузошташударо иҷро намекунад.Маркази матбуоти Сарраёсати Қӯшунҳои сарҳадии Кумитаи давлатии амнияти миллии Ҷумҳурии Тоҷикистон ваколатдор аст, изҳор намояд, ки ягон далели дар ин мақола зикршуда ба воқеият мувофиқат намекунад. Аввалан, дар раёсати минтақавии Хоруғ ягон машварате доир нашудааст, ки дар он Фармондеҳи Қӯшунҳои сарҳадии ҶТ сухан карда тавонад.Сониян, тирамоҳи соли равон дар ҷараёни ташрифи Президенти Федератсияи Русия Дмитрий Медведев ба Тоҷикистон байни Тоҷикистон ва Русия Созишномаи ҳамкорӣ оид ба масоили сарҳадӣ ва як қатор протоколҳои байниидоравӣ имзо шуда буданд, ки асосу шакли нави муносибатҳои мутақобила аз рӯи масоили сарҳадиро муайян мекунанд. Ғайр аз ин, мувофиқи Созишномаи нав дар Гурӯҳи ҳамкории сарҳадии ХФА ФР дар ҶТ дастгоҳи машваратӣ барҳам дода шудааст. Ҳоло дар он афсароне хидмат мекунанд, ки ба ҳайси мушовирону омӯзгорони Омӯзишгоҳи олии сарҳадӣ ҷалб шуда ва ба хати сарҳад намераванд.Дар ин бора ба АМИТ «Ховар» дар маркази матбуоти Сарраёсати Қӯшунҳои сарҳадии КДАМ Ҷумҳурии Тоҷикистон хабар доданд.