Маблағҳои буҷавӣ мақсаднок истифода мешаванд?

Душанбе, 27 декабр.(АМИТ «Ховар», Марзия Саидова).- Иҷрои Буҷаи давлатӣ дар 11 моҳи соли 2011 дар Вазорати мелиоратсия ва захираҳои оби ҷумҳурӣ зимни ҷаласае, ки дар палатаи поёнии парлумони мамлакат баргузор гардид, баррасӣ шуд. Саиди Ёқубзод, раиси кумитаи масъалаҳои аграрӣ ва экологии Маҷлиси намояндагон гуфт, ки тибқи маълумоти Вазорати мелиоратсия ва захираҳои оби ҷумҳурӣ ҷиҳати иҷрои буҷаи ҷумҳуриявии Вазорат инчунин лоиҳаҳои инвеститсионие, ки дар 11 моҳи соли ҷорӣ ба даст омадаанд, дар 11 моҳи соли 2011 нақшаи буҷаи ҷумҳуриявии вазорати мазкур ва сохторҳои тобеи он беш аз 21миллион сомониро ташкил медиҳад. Мавсуф зикр кард, ки дар давоми 11 моҳи соли 2011 дар тамоми сохторҳои зертобеи соҳа маблағгузории чорабиниҳои пешбинишуда пурра таъмин гардидааст. Ҳамзамон С. Ёқубзод афзуд, ки яке аз мушкилоти дар ин соҳа ҷойдошта ба таври зарурӣ маблағгузорӣ нашудани Барномаҳои давлатии соҳавӣ аст. Вазорат мувофиқи имконият иҷрои Барномаҳои соҳавиро қисман аз ҳисоби маблағҳои буҷавие, ки барои сохтмони асосӣ ҷудо мешаванд, таъмин намуда истодааст. Дар ҷаласа вазири мелиоратсия ва захираҳои оби ҷумҳурӣ Раҳмат Бобокалонов доир ба масъалаи сарфакорона ва мақсаднок истифода намудани маблағҳои буҷавӣ сухан ронда гуфт, ки вазорат нисбат ба ин масъала диққати ҷиддӣ медиҳад ва иҷрои қисми хароҷоти буҷа мунтазам дар ҷаласаҳои ҳайати мушовараи вазорат ва машваратҳои назди вазир баррасӣ мегарданд.