Масоили муҳими замон муҳокима мешавад

Душанбе, 20 декабр. (АМИТ «Ховар», Лудмила Дубинина ). – Дар Конфронси илмию амалии ҷумҳуриявӣ дар мавзӯи «Вазъи анъанаҳои иҷтимоию фарҳангӣ дар Ҷумҳурии Тоҷикистон», ки имрӯз, 20 декабр, дар Маркази тадқиқоти стратегии назди Президенти Ҷумҳурии Тоҷикистон баргузор мегардад, масъалаҳои сиёсати фарҳангии Тоҷикистон дар шароити истиқлолият, проблемаҳои таҳқиқи равандҳои воқеии иҷтимоию фарҳангӣ дар ҶТ, мақоми ВАО дар ташаккули фазои иҷтимоию фарҳангии ҶТ дар давраи гузариш, дин ва анъаноти иҷтимоию фарҳангӣ ва масоили дигар мавриди баррасӣ қарор мегиранд. Раёсати таҳқиқи равандҳои сиёсӣ ва этносиёсии Маркази тадқиқоти стратегӣ ташкилкунандаи ин чорабинӣ маҳсуб мешавад.
Дар назар аст, ки дар муҳокимаи ин мавзӯъ намояндагони мақомоти иҷроияи ҳокимияти давлатии вилоятҳои Суғду Хатлон, олимони донишкадаҳои олии кишвар, пажӯҳишгоҳҳои Академияи улуми ҶТ, мутахассисони варзидаи бахши дин иштирок менамоянд. Дар конфронс вакили Маҷлиси намояндагон Низом Қосим ва Дотсенти кафедраи сиёсатшиносии Донишгоҳи давлатии омӯзгории Тоҷикистон ба номи С.Айнӣ Раҷабмо Қосимова дар мавзӯъҳои «Заминаи қонунгузории ҳифз ва инкишофи маросимҳои миллӣ» ва «Масоили ҳуқуқии танзими анъана ва ҷашну маросимҳо дар ҶТ» гузориш медиҳанд.