Мулоқоти Ҳ. Зарифӣ бо ҳамтои эронии худ

Душанбе, 5 декабр. (АМИТ «Ховар», Пайрав Назаров ). –4 декабри соли 2011 дар чаҳорчӯби иштироки Вазири корҳои хориҷии Ҷумҳурии Тоҷикистон Ҳамрохон Зарифӣ дар Конфронси байналмилалӣ оид ба Афғонистон дар шаҳри Бонни Олмон мулоқоти ӯ бо Вазири корҳои хориҷии Ҷумҳурии Исломии Эрон Алӣ Акбар Солеҳӣ баргузор гардид.Тавре ки аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ Ховар иттилоъ доданд, ҷонибҳо масъалаҳои ҷории муносибатҳои дуҷониба ва дурнамои ҳамкории мутақобилан судмандро дар соҳаҳои тиҷорату иқтисод, гидроэнергетика ва инфрасохтор баррасӣ намуданд. Вазирони корҳои хориҷии ду кишвар масъалаҳои марбут ба Афғонистон ва идомаи ҳамкориҳои фаъоли тиҷоратӣ ва иқтисодии миёни Тоҷикистон, Афғонистон ва Эронро бо ҷалби шарикони минтақавӣ ва ниҳодҳои молиявии байналхалқӣ бо мақсади ҳарчи зудтар амалӣ сохтани лоиҳаҳои умумиминтақавӣ муҳокима карданд.Дар вохӯрӣ ҳамчунин дар мавриди дигари масъалаҳои сиёсати минтақавӣ ва байналхалқии мавриди таваҷҷӯҳи тарафайн мубодилаи афкор сурат гирифт.