Ширкати «Барқи тоҷик» хусусӣ мегардад

Душанбе, 6 декабр.(АМИТ «Ховар», Лаззат Диловарзод).- Бино ба гуфти сардори Раёсати таҷдиди сохтор ва омодасозии кадрии «Барқи тоҷик» Уғулой Хоҷаева, дар давоми солҳои 2016 – 2018 ширкати «Барқи тоҷик» хусусӣ гардонида мешавад.Ба иттилои манбаъ, таҷдиди сохтори ширкати мазкур дар се марҳила амалӣ мегардад. Марҳилаи аввал солҳои 2011 – 2013 – ро дар бар мегирад. Марҳилаи дуюми таҷдид, ки он рақобатпазирӣ ном гирифтааст, солҳои 2014 – 2015-ро дар бар мегирад ва марҳилаи сеюм, ки марҳилаи хусусигардонӣ мебошад, ба солҳои 2016 – 2018 рост меояд.Дар марҳилаи аввал ширкати «Барқи тоҷик» чун шахси ҳуқуқӣ ва инҳисоргари ягона боқӣ мемонад. Дар ин давра се зерсохтори тиҷоратӣ; истеҳсолкунанда, интиқолдиҳанда ва тақсимкунандаи барқ таъсис дода мешавад. Дар марҳилаи сеюм ширкат хусусӣ гардонида мешавад. Соҳибмулк чун шахси ҳуқуқӣ метавонад хати барқи «Ҷануб – Шимол» -ро ҳамчун моликияти хусусӣ хариду фурӯш намояд, нерӯгоҳҳои дар ихтиёр доштаашро ба ягон давлати хориҷӣ, аз ҷумла Афғонистон ё Покистон фурӯшад. Аммо ин хусусигардонӣ дар пасманзари худ чӣ паёмаде дорад, вақт нишон медиҳад.