Ҳарорати пасти ҳаво боиси сироят шудани беморӣ

Душанбе, 3 январ. (АМИТ «Ховар», Лаззат Диловарзод).- Бино ба иттилои Хадамоти обуҳавосанҷии ҷумҳурӣ, дар мавсими тирамоҳу зимистони солҳои 2011 – 2012 ҳаво нисбатан сард омад. Сард омадани тирамоҳу зимистон боиси зиёд шудани бемории зуком дар шаҳру ноҳияҳои ҷумҳурӣ гардид,- мегӯяд сардори Раёсати давлатии назорати санитарию эпидемиологии Вазорати тандурустӣ Наврӯз Ҷаъфаров. Ба гуфти Н. Ҷаъфаров, дар мавсими тирамоҳ ва як моҳи зимистони соли 2012 наздик ба 16 ҳазор нафар гирифтори бемории зуком ба қайд гирифта шуд, ки нисбат ба ҳамин давраи соли 2011 950 нафар зиёд аст. Боиси тазаккур аст, ки дар фасли тирамоҳи соли 2011 танҳо як навъи зуком – Н3 ба қайд гирифта шуд, ҳол он ки соли 2010 се навъи бемории сироятии зуком, аз қабили H1N1 H3 ва B дар чанд минтақаи ҷумҳурӣ ба қайд гирифта шуда буд. Боис ба ёдоварист, ки соли 2010 ҷиҳати пешгирии бемории зуком дар тамоми қаламрави ҷумҳурӣ маъракаи эмкунӣ гузаронида шуд, ки он боиси коҳиши бемории зуком гардид.