Ҷиноятҳои коррупсионӣ пешгирӣ мешаванд?

Душанбе, 20 январ. (АМИТ «Ховар», Лаззат Диловарзод).- Мақомоти прокуратура дар давоми соли 2011 дар натиҷаи санҷиш, баррасии мавод ва муроҷиати шаҳрвандон ба кушодани 494 парвандаи ҷиноятии иқтисодии хусусияти коррупсионидошта муваффақ шуданд. Парвандаҳои мазкур оид ба ҳолати фурӯши қитъаҳои замин, азхудкунии маблағҳои буҷавӣ, амалҳои порагирӣ ва порадиҳӣ, қаллобӣ ва саркашӣ аз пардохти андоз мебошанд,- гуфт муовини аввали прокурори генералӣ, мушовири адлияи дараҷаи дуюм Абдулқодир Муҳаммадиев ба мухбири АМИТ «Ховар».Ба иттилои манбаъ, мубориза бар зидди коррупсия ва ҷиноятҳои дорои хусусияти коррупсионӣ, аз самтҳои афзалиятноки сиёсати ҳуқуқии давлат мебошад, зеро ҷиноятҳои коррупсионӣ асоси давлату давлатдорӣ, фаъолияти мӯътадили мақомоти давлатиро халалдор намуда, ба раванди рушди иҷтимоию иқтисодӣ, ахлоқу афкори ҷамъият ва дигар паҳлӯҳои ҳаёти ҷомеа шадидан таъсири манфӣ мерасонад. -Дар прокуратураи ҷумҳурӣ ҷиҳати пешгирии амалҳои коррупсионӣ дар соли 2012 тадбирҳои самарабахш андешида мешаванд,- афзуд А.Муҳаммадиев.