Баргузории панҷ экспедитсияи байналмилалии олимон

Душанбе, 9 январ. (АМИТ «Ховар», Лаззат Диловарзод).- Бино ба маълумоти Маркази миллии ҷумҳуриявии захираҳои генетикӣ, дар соли 2011 панҷ экспедитсияи муштараки байналмилалии олимони Маркази захираҳои генетикӣ аз ФР, Фаронса, Австралия, Зеландияи Нав, Нидерландия ва Норвегия дар вилоятҳои Суғд, Хатлон ва ВМКБ баргузор шуд. Мақсад аз ташкили чунин экспедитсия, ҷамъоварии тухмии зироати кишоварзии маҳаллӣ ва ҳамавлодии ёбоии онҳо буд, ки дар давоми як сол панҷ маротиба сурат гирифт. Дар давоми баргузории экспедитсияҳо 353 тухмии навъу намунаҳои гандуму ҷав ба захирагоҳ ворид шуд. Ба захирагоҳи умумиҷаҳонии Қутби Шимоли Норвегия, воқеъ дар Свалдборд – НортГен барои садсолаҳо нигоҳдорӣ тухмии ҷаву гандум ва ҳамавлодии онҳо аз Тоҷикистон фиристода шуд.