Дусад марди ҷангӣ беҳ аз сад ҳазор….

Душанбе, 25 январ. (АМИТ «Ховар», Дилшодаи Хайруллоҳ). — Дар се соли охир магистратураи Донишкадаи такмили ихтисоси хизматчиёни давлатии Ҷумҳурии Тоҷикистонро 197 нафар хатм кардаанд, ки аз нигоҳи роҳбарияти Раёсати хизмати давлатии назди Президенти Ҷумҳурии Тоҷикистон ва Донишкадаи такмили ихтисоси хизматчиёни давлатии Ҷумҳурии Тоҷикистон ин шумора кам ҳам бошад, вале хуб аст, яъне дусад марди ҷангӣ беҳ аз сад ҳазор. 197 нафар хатмкардаи Донишкадаи такмили ихтисоси хизматчиёни давлатии Ҷумҳурии Тоҷикистон пешбарандаи сиёсати Президенти Ҷумҳурии Тоҷикистон буда, дар самти идораи давлат ва хизмати давлатӣ диди хуб доранд. Қобили зикр аст, ки имрӯз барои магистрантҳои ҷумҳурии мо шароити хуби таҳсил фароҳам оварда шудааст ва онҳо бо истифода аз шароити мусоиди баланд бардоштани сатҳу сифати савияи дониши худ пайваста кӯшиш ба харҷ медиҳанд. Боиси хушнудист, ки дипломи магистрие, ки Донишкадаи такмили ихтисоси хизматчиёни давлатии Ҷумҳурии Тоҷикистон ба онҳо медиҳад, берун аз ҷумҳурӣ ва ҳатто дар кишварҳои Аврупо соҳибэътибор аст.Болоравии мансаби магистрҳои солҳои таҳсили 2009-2010 беш аз 60 фоизро ташкил медиҳад, ки ин самараи талошҳои роҳбарияти Раёсати хизмати давлатии назди Президенти Ҷумҳурии Тоҷикистон, роҳбарият ва ҳайати устодони Донишкадаи такмили ихтисоси хизматчиёни давлатии Ҷумҳурии Тоҷикистон мебошад. Бо мақсади татбиқи пешниҳодҳо ва беҳтар кардани низоми хизмати давлатӣ зарурати таъсиси Шӯрои ҷамъиятии магистрҳо ва интихоби аъзои он пайдо гардидааст. Ҳамзамон ин амр нишони ҷалби ҷавонони лаёқатманди соҳаи хизмати давлатӣ ва истифодаи нерӯи онҳо дар рушди кишвар мебошад.