Истихроҷи газ афзоиш меёбад

Душанбе, 13 январ. (АМИТ «Ховар», Кристина Эрлих). – Вазорати энергетика ва саноати ҶТ якҷоя бо мутахассисони соҳаи нафту гази Корхонаи воҳиди давлатии «Нафту газ ва ангишт» таъмиру таҷдиди 103 чоҳи кони «Патинак» — ро анҷом доданд, ки дар натиҷаи ин истихроҷи гази табиӣ дар як шабонарӯз аз 5 ба 10 ҳазор метри мукааб расонида шуд. Дар ин бора аз Вазорати энергетика ва саноати ҶТ ба хабарнигори АМИТ «Ховар» иттилоъ доданд. Мувофиқи суханони манбаъ, ин ҳаҷми газ пурра ба шаҳри Кӯлоб равона мешавад. 11 январи соли ҷорӣ боз як маҳаллаи шаҳри Кӯлоб бо гази табиӣ таъмин гардид.Дар кони «Сурхсимо» ҳар шабонарӯз то 20 – 25 ҳазор метри мукааб гази табиӣ истихроҷ гардида ва он дар шаҳри Қӯрғонтеппа ва ноҳияи Ҷалолиддини Румӣ баҳрабардорӣ мешавад. Ғайр аз ин бо мақсади афзоиш додани истихроҷи гази табиӣ ҳоло пармакорӣ аз ҷониби ширкати «Газпром» — и Федератсияи Русия дар чоҳи рақами якуми Сариқамиш идома дорад.