Муаррифии захираҳои туристии кишвар

Душанбе, 30 январ. (АМИТ «Ховар», Дилшодаи Хайруллоҳ). – Гурӯҳи роҳбарони созмонҳои мададрасон дар Ҷумҳурии Тоҷикистон ҳар моҳ оид ба масъалаҳои вобаста ба рушди Тоҷикистон ҷаласа доир менамоянд. Гурӯҳи мазкур аз роҳбарони намояндагиҳои институтҳои байналмилалии молиявӣ ва сафоратхонаҳои кишварҳои хориҷӣ иборатанд.Дар айни замон роҳбарии гурӯҳро сафири Ҷумҳурии Исломии Покистон дар Тоҷикистон Ҷаноби Амҷад Ҳусейн Сиял ба ӯҳда дорад. Ба ҷаласаи навбатии гурӯҳ барои муаррифии захираҳои туристии Тоҷикистон ва баррасии масъалаҳои вобаста ба рушди туризм дар Тоҷикистон раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов даъват гардид. М.Неъматов доир ба корҳои анҷомдодаи сохторҳои дахлдори Ҳукумати Ҷумҳурии Тоҷикистон ва имконоту захираҳои туристии мамлакат сухан гуфт. Баъдан аъзои гурӯҳ ба раиси кумита саволҳои худро пешниҳод намуданд.Раиси кумита М.Неъматов ба суолҳои ҳозирин посухҳои мушаххас дода, аз аъзои гурӯҳ ҷиҳати ҳамкорӣ дар самти баланд бардоштани сатҳи хизматрасонӣ дар соҳа ва ҳамзамон табодули таҷрибаи мутахассисон дар кишварҳои хориҷӣ даъват ба амал овард.Муаррифиномаи захираҳои туристии Тоҷикистон аз ҷониби гурӯҳ мусбат баҳогузорӣ гардида, перомуни ҳамкориҳои дуҷониба омодагӣ изҳор гардид. Дар ин бора ба мухбири АМИТ «Ховар» аз бахши иттилоотию таҳлилии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд.