Мулоқот бо ширкатҳои туристӣ

Душанбе, 30 январ. (АМИТ «Ховар», Дилшодаи Хайруллоҳ). –Дар Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон мулоқоти навбатии намояндагони ширкатҳои туристии мамлакат, масъулини бахши туризми кумитаи мазкур ва раёсати консулии Вазорати корҳои хориҷӣ баргузор гардид. Дар доираи вохӯрӣ шарикон аз натиҷаҳои фаъолият дар соли 2011 ва доир ба бархе аз масоили ҳалталаб мубодилаи афкор намуданд. Қайд шуд, ки бо дастгирии роҳбарияти Вазорати корҳои хориҷӣ дар тӯли се соли охир дар қонунгузории соҳаи туризм истилоҳҳои назаррас ворид карда шуданд, ки барои пешрафти соҳа нақши арзанда мебозанд. Ширкатҳои туристии мамлакат аз муносибатҳои нек ва самарабахш бо Кумитаи ҷавонон, варзиш ва сайёҳӣ ва Вазорати корҳои хориҷӣ изҳори миннатдорӣ намуданд. Дар навбати худ роҳбарияти ширкатҳои туристии мамлакат ба пурсишҳои худ ҷавобҳои мушаххас гирифта, изҳори омодагӣ намуданд, ки ҷиҳати баланд бардоштани хизматрасонӣ тадбирҳои зарурӣ меандешанд.