Президент сарварони навтаъинро ба садоқат ба халқу Ватан даъват намуд

Душанбе, 16 январ. (АМИТ «Ховар»).-Президенти кишвар Эмомалӣ Раҳмон нафарони ба вазифаҳои воломақом дар сохторҳои Вазорати корҳои дохилӣ ва Агентии назорати давлатии молиявӣ ва мубориза бо коррупсия пешниҳодшударо ба ҳузур пазируфт. Баъди сӯҳбат бо Сарвари давлат Эмомалӣ Раҳмон Нурилло Орипов муовини якуми вазири корҳои дохилӣ, Шералӣ Сабзов муовини вазири корҳои дохилӣ, Абдураҳмон Бузмаков сардори Раёсати корҳои дохилии шаҳри Душанбе, Анвар Тағоймуродов сардори Раёсати корҳои дохилии вилояти Хатлон, Мансур Бухориев Сардори шӯъбаи корҳои дохилии шаҳри Ваҳдат, Хуршед Каримов сардори Сарраёсати назорати давлатии молиявии Агентии назорати давлатии молиявӣ ва мубориза бо коррупсия таъин шуданд. Дар маҷмӯъ 14 нафар дар сохторҳои гуногуни мақомоти номбаршуда ба вазифаҳои пурмасъулият таъин гардиданд. Президенти кишвар Эмомалӣ Раҳмон зимни сӯҳбат онҳоро ба садоқат ба халқу Ватан ва риояи адолату матонат дар иҷрои вазифаҳои пурмасъулияташон ҳидоят намуда, таъкид дошт, ки ин сифатҳо дар мубориза бо ҷинояту ҷинояткорӣ, хусусан ҷиноятҳои созмонёфтаи гурӯҳӣ ва дорои характери коррупсионӣ басо муҳиманд. Дар назди онҳо ва роҳбарияти ҳарду сохтори мазкур, ҳамчунин доир ба тарбияи кадрҳои ҷавону болаёқат, баланд бардоштани донишу малакаи касбии кормандон ва бо сифати дилхоҳ ба роҳ мондани фаъолияти ҳамарӯза вазифаҳои мушаххас гузошта шуд. Дар ин бора ба АМИТ «Ховар» аз Хадамоти матбуоти Сарвари давлат иттилоъ доданд.