Роҳбарони ВКХ ҶТ ва ҶМЧ якдигарро табрик гуфтанд

Душанбе, 6 январ. (АМИТ «Ховар», Пайрав Назаров). – «Басо шарафмандам, ки табрикоти самимона ва орзӯҳои беҳтаринамро ба муносибати 20 – умин солгарди барқароршавии равобити дипломатии байни кишварҳои дӯстамон ба Шумо, Аълоҳазрат, иброз дорам», — гуфта мешавад дар табрикномаи вазири ВКХ ҶТ Ҳамрохон Зарифӣ унвонии вазири корҳои хориҷии ҶМЧ Ян Тзечи ба муносибати 20 – солагии барқароршавии муносибатҳои дипломатии миёни Тоҷикистон ва Чин.Чунонки дар табрикнома омадааст, баъди истиқлолият пайдо кардани Тоҷикистон саҳифаи нави таърихи муносибатҳои халқҳоямон кушода шуд. Чин яке аз аввалинҳо шуда, истиқлолияту соҳибихтиёрии миллии моро этироф намуд.Имрӯз ба муносибатҳои Тоҷикистону Чин, ки дар принсипҳои устувори баробарӣ, эҳтироми якдигар ва ба назари эътибор гирифтани манфиатҳои ҳамдигар қарор доранд, рушди босуръату сатҳи баланди ҳамкории амалӣ хосанд.Шубҳае нест, ки ин санаи пуршарафи таърихи муосири муносибатҳои Тоҷикистону Чин муҷиби рушди наву ҳар чи бештари муносибатҳои мутақобилаи мо мегардад, ки ба он ҳамбоварию фоидаи якдигар, мушорикати баробарҳуқуқ, эҳтироми гуногунии фарҳанг ва саъю кӯшиш баҳри рушди умумӣ хос аст.Дар навбати худ вазири корҳои хориҷии ҶМЧ Ян Тзечи дар табрикномааш унвонии ҳамтои тоҷикистониаш қайд намуд, ки тайи 20 соли баъди барқароршавии равобити дипломатӣ муносибатҳои дӯстона ва ҳамкории байни ҶМЧ ва ҶТ муваффақонаю самарабахш рушду густариш меёбанд. Ҷонибҳо якдигарро дар масоили сиёсӣ дастгирӣ менамуданд, ҳамкории мутақобилан муфиди иқтисодиро роҳандозӣ мекарданд, дар бахши амният ба якдигар самимона кӯмак менамуданд, дар доираи СММ, СҲШ ва созмонҳои дигари байналмилалӣ зич ҳамкорӣ намуда ва бо ин васила ба ҳифзу таҳким бахшидани амнияти минтақа фаъолона ҳисса мегузоштанд. Ҷониби Чин аз натиҷаи рушди муносибатҳои дутарафа, ки дар давоми 20 соли баъди барқарор шудани муносибатҳои дипломатии ҳар ду кишварамон ба даст омадааст, қанотманд аст.Вазорати корҳои хориҷии ҶМЧ омода аст, ки мутобиқи принсипу мақсадҳои Шартнома оид ба ҳамсоягии нек, дӯстӣ ва ҳамкории байни ҶМЧ ва ҶТ бо Вазорати корҳои хориҷии ҶТ минбаъд ҳам робитаҳои зич барқарор намуда, аҳду паймонҳои сарони ҳар ду кишварро ҳамаҷониба дар амал татбиқ намуда ба рушди муттасили муносибатҳои Чину Тоҷикистон мусоидат кунад.Дар ин бора ба АМИТ «Ховар» дар Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ хабар доданд.