Самуэл Это’О: Президент ба ҳимоя бармехезад

Душанбе, 4 январ. ( АМИТ «Ховар», Аловиддин Бӯриев).- Тавре ки хабар дода будем, Самуэл Это’О ҳамлагари дастаи мунтахаби Камерун ва «Анҷи» барои саркашӣ ва ширкат накардан дар вохӯрии дӯстонаи дастаи мунтахаби Камерун бо Алҷазоир аз ҷониби федератсияи футболи ин кишвар аз 15 бозии дастаи мунтахаб маҳрум карда шуд. Гайр аз капитани даста Самуэл Это’О дигар бозингарон низ бо ин айб муҷозот шуданд. Бино бар хабари сомонаи footafrica365.fr пеш аз соли нав сарвазири Камерун Филемон Янг раиси федератсия Ия Муҳаммадро ба хузур пазируфта, дастури президент Пол Бийро дар мавриди дидани қазияи Это’О-ро расонид. Аз рӯи тахмини расонаҳо рӯзи 6 январ дар ҷаласаи федератсия ин масъала ҳал хоҳад шуд. Самуэл Это’О метавонад танҳо бо ҷаримаи сабук аз ин масъалаи басо муҳим раҳоӣ ёбад. Вобаста ба ин мавзӯъ муҳофизатгари дастаи мунтахаби Камерун ва «Анҷи» Бенуа Ангбва ва нимҳимоятгари «Олимпиакос» Жан Макун, ки аз ду вохӯрии дастаи мунтахаб ронда шудаанд, изҳор кардаанд, ки то масъалаи Это’О ва Эйонг Эно ҳалли худро наёбад, бозиашонро дар дастаи мунтахаб қатъ хоҳанд кард.