Барои фаъолияти мӯътадили кори дил

Душанбе, 7 феврал. (АМИТ «Ховар», Лаззат Диловарзод).- Тибқи иттилои масъулини сафорати Иёлоти Муттаҳидаи Амрико дар Тоҷикистон ба маркази эндокринологии ҷумҳуриявӣ хайрияи нави тиббӣ расонида шуд. Дар маросими танзими кӯмаки башардӯстона корманди сафорати Амрико дар Тоҷикистон хонум Сера Пенҳоюн ширкат варзид. Кӯмак ба арзиши зиёда аз 2 млн. доллар аз ҷониби ширкати амрикоии Ели Лили ва Департаменти ИМА ва лоиҳаи ҲОУП барои гирифторони бемориҳои дил расид. Он беш аз 26 ҳазору 800 вояи инсулинро ташкил дода, ба тарзи ройгон ба шӯъбаи эндокринологии беморхонаи Қарияи Боло дода шуд.Тибқи лоиҳаи ҲОУП ин лавозимоти тиббӣ ба дигар марказҳои эндокринологии ҷумҳурӣ низ таҳвил дода мешавад. Бояд ёдовар шуд, ки лоиҳаи ҲОУП ба Тоҷикистон маводу таҷҳизоти тиббиро ба маблағи умумии 302 млн. доллар таъмин намудааст. Аз соли 1992 то имрӯз мардуми Амрико тавассути лоиҳаю барномаҳо ва ёрии башардӯстона ба соҳаҳои маориф, тандурустӣ ва рушди иқтисодиёти кишвар ба маблағи 984 доллар кӯмак расонидааст.