Дар «Сояи нигоҳ»-и Шоҳона

Душанбе, 27 феврал.(АМИТ «Ховар», Марзия Саидова).-Нашриёти «Адиб» маҷмӯаи шеърҳои шоираи ҷавону хушқалам Шоҳонаи Сулаймонро таҳти унвони «Сояи нигоҳ» аз чоп баровард. Шоҳона розу ниёз ва рӯзгори пур аз шебу фарози бонувони кӯҳистони тоҷикро ҷомаи шеър пӯшонида, дар маҷмӯа гирд овардааст. Шеърҳои шоираи ҷавон саршори ишқу муҳаббати поку беолоиш ва самимӣ буда, тахайюлоти ширин ва эҳсоси наҷиби Шоҳонаро дар худ таҷассум намудаанд. Қаблан Шоҳона ду китоби худро бо номҳои «Хаёли ситорачин» ва «Сад тарона» дар нашриёти «Адиб» ва Ҳумо» ба табъ расонида, пешкаши дӯстдорони каломи бадеъ гардонида буд. Шоҳона бо вуҷуди фаъолияти рӯзноманигорӣ дар ҷодаи каломи бадеъ низ қаламсанҷӣ намуда, муваффақ ҳам гардидааст. Муҳаббат ба диёру тасвири эҳсоси ҷаҳони ботинии ёр, ситоиши инсонҳои бошараф ва бозтоби муаммоҳои рӯзгор маҳаки асосии шеъру таронаҳои Шоҳонаро ташкил медиҳанд.