Фаъолияти шӯъбаи махсуси назоратӣ

Душанбе, 29 феврал. (АМИТ «Ховар», Лаззат Диловарзод).- Ҷиҳати назорати мунтазами фаъолияти «Маркази идораи лоиҳаҳои инвеститсионӣ» дар сохтори Агентии назорати давлатии молиявӣ ва мубориза бо коррупсия шӯъбаи махсус оид ба назорати маркази мазкур амал мекунад. Тибқи маълумоти раёсати пешгирии коррупсияи Агентии назорати давлатии молиявӣ ва мубориза бо коррупсияи ҶТ, назорат ва санҷиши ҳарсолаи шӯъбаи махсуси Агентӣ камбудиву норасоиҳоро дар «Маркази идораи лоиҳаҳои инвеститсионӣ» нисбат ба солҳои пешин хеле кам кард.Ба иттилои манбаъ, агар соли 2009 дар натиҷаи санҷиш ба маблағи 6,7 млн. сомонӣ камбудиҳои молиявӣ дар «Маркази идораи лоиҳаҳои инвеститсионӣ» ошкор шуда бошанд, соли 2010 зарари молиявии ошкоршуда 18,4 млн. сомониро ташкил дод. Соли 2011 зарари молиявии ошкоршуда дар ин марказ ҳамагӣ 3,4 млн. сомонӣ мебошад, ки он нисбат ба ду сол пеш хеле кам шудааст.Шӯъбаи махсуси Агентӣ санҷиши фаъолияти «Маркази идораи лоиҳаҳои инвеститсионӣ»-ро дар соли ҷорӣ ҳам ба нақша гирифтааст, ки натиҷаи санҷиши аввал дар моҳи июл ва солонаи он моҳи декабри соли 2012 ҷамъбаст мегардад.