Истеҳсоли маҳсулот бо рамзҳои наврӯзӣ

Душанбе, 23 феврал. (АМИТ «Ховар», Дилшодаи Хайруллоҳ).– Корхонаҳои саноатии Вазорати энергетика ва саноати Ҷумҳурии Тоҷикистон барои сазовор пешвоз гирифтани ҷашни байналмилалии Наврӯз истеҳсоли маҳсулотро бо рамзҳои Наврӯзӣ роҳандозӣ мекунанд. КВД «Зари Кӯлоб», КФ заргарии «Данғара», ҶДММ «Тоҷик Кристал», ҶДМ «Гранит», КД «Востокредмет» аз ҷумлаи он корхонаҳоеанд, ки барои харидорони худ маҳсулоти заргарӣ, гӯшворҳову гарданбандҳо, ангуштариву дастпонаҳои миллӣ, армуғонҳо, қуфли гарданбанд ва дигар перояҳо тайёр мекунанд. Корхонаҳои ҶДМ «Рухом» ва КВД «Ҷамаст» сангҳои ороишии рӯимизӣ, дарахтони сангӣ, тасбеҳҳо, мӯҳраҳо гарданбандҳо, қандилҳо ва дигар маҳсулоти армуғониро бо рамзи наврӯзӣ пешкаши миҷозон хоҳанд кард. Дар арафаи иди Наврӯз соҳаи саноати сабук ва ҳунарҳои бадеию халқӣ, аз ҷумла корхонаҳои ҶММ «Атласи Хуҷанд» ҶММ «Дилором», ҶММ «ИИ Нассоҷии Тоҷик», ҶММ «Ёқутиён», ҶММ «Зинат», ҶММ «Садранги Кӯлоб» маҳсулоти идона истеҳсол менамоянд. Бояд тазаккур дод, ки корхонаи ҶММ «Атласи Хуҷанд» бештар аз 15 намуди атлас истеҳсол менамояд ва 4 намуди он «Ганҷина», «Идона», «Шодиёна» ва «Истиқлол» матоъҳои ҷашнӣ буда, барои модарону бонувони тоҷик тӯҳфаҳои хубу арзанда аст.