Иттиҳоди Аврупо омодаи ҳамкорӣ бо Тоҷикистон аст

Душанбе, 14 феврал. (АМИТ «Ховар», Покиза Маҳмадбекова). — Имрӯз дар Душанбе мулоқоти вазири рушди иқтисод ва савдои ҷумҳурӣ Шариф Раҳимзода бо роҳбари намояндагии Иттиҳоди Аврупо дар Тоҷикистон сафир Эдуард Ауэр баргузор гардид. Аз Вазорати рушди иқтисод ва савдои ҷумҳурӣ ба мухбири АМИТ «Ховар» иттилоъ доданд, ки дар рафти мулоқот сафири Аврупо қайд намуд: «Мо омодаем, ки ҳамкориҳоро дар самти татбиқи лоиҳаҳои афзалиятнок баҳри рушди иқтисоди миллии Ҷумҳурии Тоҷикистон равона созем». Дар ҷараёни мулоқот ҷонибҳо вазъи иқтисодию иҷтимоии кишвар ва раванди ислоҳоти иқтисодиро дар ҷумҳурӣ баррасӣ намуда, атрофи масъалаҳои ҷорӣ ва дурнамои ҳамкориҳои марбут ба рушди робитаҳои дуҷониба мубодилаи афкори судманд намуданд.