Изҳороти ВКХ ҶТ перомуни барномаи «Честный понедельник» тавассути шабакаи НТВ

Душанбе, 2 феврал. (АМИТ «Ховар», Пайрав Назаров).- 30 январи соли 2012 зимни барномаи «Честный понедельник», ки тавассути шабакаи НТВ намоиш дода шуд, публитсисти рус Егор Холмогоров ва роҳбари Ҳизби либералӣ-демократии Русия Владимир Жириновский бо изҳороти беасос дар бораи гӯё мавҷуд будани ҳолатҳои қатли оми аҳолии руси Тоҷикистон дар оғози солҳои 90-ум баромад карданд. Онҳо инчунин ба хотири қатъи ҷалби қувваи кории берунӣ ба Русия, хусусан аз Тоҷикистон сухан гуфтанд.Сардори Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Чумҳурии Тоҷикистон Давлаталӣ Назриев доир ба ин масъала изҳорот пахш намуд, ки дар он, аз ҷумла омдааст: «чунин изҳоротҳо борҳо дар давоми чанд соли охир тавассути воситаҳои ахбори оммаи рус паҳн мегардиданд. Бояд ёдовар шуд, ки дар даврони ҷанги шаҳрвандӣ дар Тоҷикистон мухолифат байни гурӯҳҳои тоҷик сурат мегирифт ва далелҳои хаёлии “қатли оми аҳолии рус” ҳеҷ гоҳ вуҷуд надоштанд. Дар ин робита мо аз чунин изҳороти бемантиқи ходимони Федератсияи Русия дар тааҷҷуб буда, инчунин доир ба адами вокуниши муносиб ва раддияи расмӣ аз ҷониби ҳукумати Русия перомуни изҳороти хусуматомез нисбат ба миллати тоҷик, нашр ва пахши он дар ВАО ибрози таассуф мекунем. Мо умед дорем, ки ВАО-и Русия минбаъд аз нашр ё иҷозати пахши чунин изҳорот, ки ҳеҷ асоси воқеӣ надошта, танҳо ба барангезиши ихтилофоти миёни миллатҳо нигаронида шудааст, худдорӣ хоҳад кард.