Конфронси Муоҳадаи Париж

Душанбе, 22 феврал. (АМИТ «Ховар», Лутфия Эшонқулова). – Чанде пеш дар шаҳри Венаи Австрия Конфронси сеюми вазоратии мушорикони Муоҳадаи Париж баргузор гарндид, ки дар он Муншии умумии СММ Пан Ги Мун, Директори иҷроияи Раёсати СММ оид ба маводи нашъаовар ва ҷинояткорӣ Юрий Федотов, вазирони корҳои хориҷӣ ва вакилони олимақоми 55 кишвари ҷаҳон ширкат доштанд. Мутобиқи ваколатномаи Муоҳадаи Париж мавзӯи конфронс иборат аз проблемаи ҷилавгирии паҳншавии маводи нашъаовар буд. Тоҷикистонро дар ин чорабинӣ директори Агентии назорати маводи нашъаовари назди Президенти ҶТ Рустам Назаров ва сафири Тоҷикистон дар Австрия, намояндаи доимии ҶТ дар Раёсати СММ оид ба маводи нашъаовар ва ҷинояткорӣ Нуриддин Шамсов намояндагӣ намуданд. Роҳбари Агентии назорати маводжи нашъаовар Рустам Назаров зимни суханрониаш мавқеи Ҳукумати ҷумҳуриро, ки мақсад аз он ҳалли проблемаҳои минтақавӣ дар бахши назорати маводи нашъаовар ва зарурати рушди минбаъдаи ҳамкории самарабахши миёни СММ, Афғонистон ва кишварҳои ҳамсояи он дар ин самт мебошад, баён кард.Аз рӯи натиҷаи конфронс «Эъломияи Вена» қабул шуд, ки дар он самтҳои дурнамои фаъолияти иштирокдорони Муоҳадаи Париж инъикос ёфтаанд.