Намоиши ҳунари рассом
Душанбе, 27 феврал. (АМИТ «Ховар», Музаффари Рустам). — 3 марти соли 2012 бо кӯмаки молиявии шӯъбаи Ташкилоти байналмилалии Институти «Ҷомеаи Кушода»- Бунёди Мадад дар Тоҷикистон дар нигорхонаи ҳунарии «Мино», ки дар бинои Иттифоқи меъморони Тоҷикистон, кӯчаи Беҳзод, №1 ҷойгир аст, намоиши инфиродии ҳунари рассоми шодравон Ботур Аллаберганов ифтитоҳ мегардад. Ба маърази тамошо 73 асари рассом, аз қабили наққошӣ, тарроҳӣ, расмҳо, мусаввада ва ҳазлҳои дӯстона, бо шумули асарҳои нотамом гузошта мешаванд. Мутахассисон ба ҳунари рассом баҳои баланд дода, дар асарҳои ӯ рӯй задани воқеияти замонро бо ҳазлу анъанаҳои маишии мардумӣ мебинанд. Офаридаҳои муаллиф дар осорхонаҳо ва коллексияҳои хусусӣ дар Тоҷикистон ва хориҷ аз он дар Полша, Муғулистон, кишварҳои Африка ва ғайра маҳфузанд. Ботур Аллаберганов 9 майи соли 1941 таваллуд шуда, соли 1967 Омӯзишгоҳи ҷумҳуриявии рассомии ба номи М. Олимов ва соли 1973 Институти давлатии театриву рассомии Тошкандро хатм кардааст. Ӯ фаъолияти худро ба омӯзгорӣ бахшида, дар Коллеҷи ҷумҳуриявии рассомии ба номи М. Олимов ва Донишгоҳи техникии Тоҷикистон ба номи академик М. Осимӣ аз наққошӣ дарс гуфтааст. 1 декабри соли 2011 Ботур Аллаберганов бармаҳал аз ҳаёт чашм пӯшид.