НБО «Сангтӯда – 2» фаъол мешавад

Душанбе, 13 феврал. (АМИТ «Ховар», Кристина Эрлих). – НБО «Сангтӯда – 2», ки онро Вазорати энергетика ва саноати ҶТ якҷоя бо ширкати эронӣ бунёд кардааст, суръати тавлиди қувваи барқро баланд мебардорад. Дар ин бора ба АМИТ «Ховар» аз Вазорати энергетика ва саноати ҶТ хабар доданд.Хотирнишон месозем, ки агрегати якуми нерӯгоҳ дар арафаи таҷлили Рӯзи Истиқлолияти давлатии Тоҷикистон мавриди истифода қарор гирифта буд. Аз оғози моҳи январи соли ҷорӣ, дар рӯзҳои барои энергетикҳо душвор, қувваи барқи НБО «Сангтӯда – 2» ба Системаи ягонаи энергетикии кишвар ворид гардид. Нерӯгоҳи «Сангтӯда – 2» дар рӯзҳои аввали фаъолияташ дар системаи ягонаи энергетикии мамлакат ҳар шабонарӯз аз 50 то 60 ҳазор киловатт – соат қувваи барқ ҳосил менамуд. Алҳол ин нерӯгоҳ дар як шабонакрӯз беш аз 1,2 миллион киловатт — соат қувваи барқ ҳосил менамояд, ки ба таъмини аҳолӣ бо нерӯи барқ ва фаъолияти системаи энергетикии кишвар таъсири мусбат мерасонад. Аз оғози истифодаи нерӯгоҳи мазкур қариб 8,5 миллион киловатт – соат қувваи барқ тавлид шудааст.