Ниҳоди байналмилалӣ фаъолияташро тақвият мебахшад

Душанбе, 15 феврал.(АМИТ «Ховар», Марзия Саидова).- Ҷумҳурии Тоҷикистон тамоми шароитро ҷиҳати тавсеаи муносибот бо Федератсияи байналмилалии Салиби Сурх ва Ҳилоли Аҳмар /ФБСС ҲА/ фароҳам овардааст, гуфт Амиршо Миралиев, муовини аввали Раиси Маҷлиси намоянлдагони Маҷлиси Олии ҷумҳурӣ зимни мулоқот бо Евгений Парфёнов, роҳбари барномаҳои аврупоии ФБСС ва ҲА. Муҳаммадато Султонов, котиби матбуотии Маҷлиси намояндагон иттилоъ медиҳад, ки ҷонибҳо зимни мулоқот масъалаҳои тақвияти ҳамкории Тоҷикистон бо ниҳодҳои бонуфузи байналмилалии федератсияи мазкурро баррасӣ карданд. А. Миралиев таъкид кард, ки дар ин замина парлумони Тоҷикистон барои рушди равобит фазои мусоиди ҳуқуқиро фароҳам овардааст. Ҳар ду ҷониб изҳор доштанд, ки алоқаманди густариши ҳамкорӣ миёни якдигар ҳастанд. Амиршо Миралиев соли 2012 – ро соли истифодаи имконоти нав дар бобати ба роҳ мондани ҳамкориҳои судманд байни вазорату идораҳои марбутаи Тоҷикистон бо ФБСС ва ҲА арзёбӣ намуд ва гуфт, ки равобити ҳасана омили асосии татбиқи барномаҳои иҷтимоию иқтисодӣ шуда метавонанд.  Евгений Парфёнов, роҳбари барномаҳои аврупоии ФБСС ва ҲА сатҳи ҳамкории Федератсияи мазкурро бо вазорату идораҳои дахлдори Тоҷикистон қонеъкунанда донист ва афзуд, ки Федератсия имсол ва солҳои минбаъда фаъолияти худро дар тамоми минтақаҳои Тоҷикистон, хусусан дар самти пешгирӣ аз офатҳои табиӣ, кор бо муҳоҷирони меҳнатӣ ва ҳимояи ҳуқуқҳои шаҳрвандон тақвият мебахшад.