Семинар дар ноҳияи Шоҳмансур

Душанбе, 23 феврал. (АМИТ «Ховар», Дилшодаи Хайруллоҳ).-Имрӯз дар литсейи №55-и ноҳияи Шоҳмансури шаҳри Душанбе семинари шаҳрии ҷонишинони директор доир ба корҳои тарбиявӣ бахшида ба рӯзи Артиши миллӣ ва 12- солагии таъсисёбии Созмони талабагӣ баргузор гардид.  Дар семинар меҳмонон аз сохтору идораҳои дахлдор, инчунин ҷонишинони директорони мактабҳои шахри Душанбе ширкат намуданд. Дар ибтидо аз ҷониби хонандагони мактаб бахшида ба 19- умин солгарди таъсиси Артиши миллӣ барномаи адабию бадеӣ пешниҳод шуд. Дар барнома хонандагон дар васфи Ватан шеъру суруд хонда, инчунин бо саҳначаҳои ҳаҷвию рақсҳои мавзун хотири ҳозиринро болида гардониданд. Дар семинар сардори Маркази кӯдакон ва наврасони шаҳри Душанбе Комилҷон Холов аз вазъи корҳои тарбиявӣ дар мактабҳои таҳсилоти миёнаи умумии нохияҳои шаҳри Душанбе сухан гуфт ва бо истифода аз фурсати муносиб муҳассилинро бо иди Артиши миллии Ҷумҳурии Тоҷикистон табрик намуда, онҳоро ба худогоҳиву меҳанпарварӣ ва ифтихор аз ватани маҳбуб ҳидоят намуд. Мавриди зикр аст, ки тибқи нақшаи Раёсати маорифи шаҳри Душанбе ҳамин гуна семинарҳо аз тарафи Муассисаи кӯдакон ва наврасон ҳар моҳ ташкил карда мешавад.