Ш. Зуҳуров хостори тақвияти фаъолияти Гурӯҳҳои дӯстии парлумон шуд

Душанбе, 13 феврал.(АМИТ «Ховар», Марзия Саидова).- Шукурҷон Зуҳуров, Раиси Маҷлиси намояндагони Маҷлиси Олии Ҷумҳурии Тоҷикистон хостори тақвияти ҳамкории Гурӯҳҳои дӯстии парлумони Тоҷикистон бо парлумонҳои кишварҳои хориҷӣ гардидааст. Мавсуф зимни баррасии масъалаҳои марбут ба таҳкими равобити байнипарлумонии Тоҷикистон бо парлумонҳои кишварҳои ҷаҳон 13 феврал дар ҷаласаи Шӯрои Маҷлиси намояндагон тақвияти равобити густурдаро таъкид кард. Муҳаммадато Султонов, котиби матбуотии палатаи поёнии парлумони мамлакат иттилоъ медиҳад, ки дар ҷаласаи Шӯро ба қарорҳои Шӯрои Маҷлиси намояндагон «Дар бораи ташкили Гурӯҳи дӯстӣ ва ҳамкории Маҷлиси намояндагони Маҷлиси Олии Ҷумҳурии Тоҷикистон бо Вулуси Ҷиргаи Шӯрои миллии Ҷумҳурии Исломии Афғонистон, Парлумони Ҷумҳурии Арманистон, Ассамблеяи миллии Маҷлиси Шӯрои Ҷумҳурии Исломии Покистон, Маҷлиси Шӯрои Исломии Эрон, Верховная Радаи Украина, Маҷлиси Умумичиноии намояндагони халқи Ҷумҳурии Мардумии Чин ва Палатаи намояндагони Парлумони Ҷопон » тағйирот ворид карда шуд. Аъзои Шӯро ҳамзамон таъсиси Гурӯҳҳои дӯстӣ ва ҳамкории Маҷлиси намояндагони Маҷлиси Олии Ҷумҳурии Тоҷикистон бо Палатаи намояндагони Шоҳигарии Белгия, Парлумонҳои (Сейми) Латвия, Литва, Финляндия ва Муғулистонро муҳим арзёбӣ карданд. Дар ҷаласа ҳамзамон ба қарорҳои Шӯрои Маҷлиси намояндагони Маҷлиси Олии Ҷумҳурии Тоҷикистон «Дар бораи пешниҳоди вакилони Маҷлиси намояндагони Маҷлиси Олии Ҷумҳурии Тоҷикистон ба ҳайати Комиссияҳои доимии Ассамблеяи байнипарлумонии кишварҳои узви Иттиҳоди Давлатҳои Мустақил ва ба ҳайати Ассамблеяи байнипарлумонии Иттиҳоди иқтисодии АвруОсиё» тағйирот ворид карда шуд.