Созишномаи байни Тоҷикистону Русияро парлумон баррасӣ намуд

Душанбе, 27 феврал.(АМИТ «Ховар», Марзия Саидова).-Созишномаи Ҷумҳурии Тоҷикистон ва Федератсияи Русия оид ба ҳамкорӣ дар масъалаҳои сарҳадӣ дар ҷаласаи Шӯрои палатаи поёнии парлумони ҷумҳурӣ, ки дар ҳузури Шукурҷон Зуҳуров, раиси Маҷлиси намояндагон баргузор шуд, муҳокима гардид. Муҳаммадато Султонов, котиби матбуотии палатаи поёнии парлумони мамлакат иттилоъ медиҳад, ки аъзои Шӯро ҳамзамон лоиҳаи қонунҳои Ҷумҳурии Тоҷикистон «Оид ба ворид намудани тағйиру иловаҳоро ба қонунҳои Ҷумҳурии Тоҷикистон «Дар бораи Ваколатдор оид ба ҳуқуқи инсон дар Ҷумҳурии Тоҷикистон», «Дар бораи ворид намудани тағйиру иловаҳо ба Кодекси оби Ҷумҳурии Тоҷикистон» баррасӣ карданд. Маҳмадалӣ Ватанов, раиси кумитаи Маҷлиси намояндагон ва дигар аъзои Шӯро доир ба масъалаҳои мазкур табодули назар намуда, изҳор дошт, ки мақсад аз ворид намудани тағйиру иловаҳо ба қонунҳои мазкур такмили фаъолияти Ваколатдор оид ба ҳуқуқи инсон дар Ҷумҳурии Тоҷикистон, таъмини ҳифзи ҳуқуқи инсон дар мамлакат, пешгирӣ ва мубориза бар зидди ҷинояткорӣ, истифодаи самараноки об ва мутобиқ намудани онҳо ба қонунҳои амалкунанда мебошад.