Тоҷикистону Русия ҳамкориҳои марзиро тақвият мебахшанд

Душанбе, 29 феврал.(АМИТ «Ховар», Марзия Саидова).-Созишномаи байни Ҷумҳурии Тоҷикистон ва Федератсияи Русия доир ба ҳамкорӣ дар масъалаҳои сарҳадиро 29 феврали соли 2012 палатаи поёнии парлумони Тоҷикистон-Маҷлиси намояндагон ба тавсиб расонд. Шералишоҳ Мирзоев, фармондеҳи Қӯшунҳои сарҳадии Ҷумҳурии Тоҷикистон дар мавриди Созишномаи мазкур гуфт, ки он самтҳои асосии ҳамкорӣ ва афзалиятҳои Ҷумҳурии Тоҷикистон ва Федератсияи Русияро дар бахши сарҳадӣ, хусусан дар мавриди омода намудани мутахассисон ва кадрҳо дар муассисаҳои низомии Русия, расонидани кӯмак ҷиҳати интиқоли бору молҳо тавассути ҳавопаймоҳои Русия муайян менамояд. Санади мазкурро сентябри соли 2011 дар Душанбе сарони кишварҳои Тоҷикистону Русия- Эмомалӣ Раҳмон ва Дмитрий Медведев ба имзо расониданд. Шералишоҳ Мирзоев афзуд, ки ҳудуди 200 нафар шаҳрванди Тоҷикистон дар муассисаҳои таҳсилоти олии низомии Русия ба таври ройгон таҳсил намудаанд ва онҳо дар бахши нерӯҳои марзбонии кишварамон хизмат менамоянд. Ҳамзамон Амирқул Азимов, вакили Маҷлиси намояндагон гуфт, ки Тоҷикистону Русия дар мубориза бар зидди гардиши ғайриқонунии маводи мухаддир, терроризму ифротгароӣ ва ҷиноятҳои дорои хусусияти фаромиллӣ, инчунин табодули иттилоот ва омоданамоии мутахассисони бахши низомӣ ҳамкории самарабахш доранд. Мавриди зикр аст, ки Созишномаи мазкурро 22 феврали соли 2012 Думаи давлатии Русия ба тасвиб расонда буд.