Вакилон қонуни ангиштро таҳия карданд

Душанбе, 9 феврал.(АМИТ «Ховар», Марзия Саидова).-Сарзамини Тоҷикистон 4,5 миллиард тонна захираи ангишт дошта, аммо дар як сол дар ҷумҳурӣ ҳудуди беш аз 140 ҳазор тонна ангишт истеҳсол карда мешавад. Матлаби мазкур дар муҳокимаи парлумонӣ, ки 9 феврал дар палатаи поёнии парлумон баргузор гардид, зикр шуд. Муҳокимаи парлумонӣ бо ибтикори Кумита доир ба масъалаҳои энергетика, сохтмон ва коммуникатсияи Маҷлиси намояндагон гузаронида шуда, дар он лоиҳаи Қонуни Ҷумҳурии Тоҷикистон «Дар бораи ангишт», ки аз сӯи вакилон Шодӣ Шабдолов, Маҳмадраҳим Каримов, Исмоил Талбаков ва Маҳмадшариф Нозимов таҳия шудааст, мавриди баррасӣ қарор гирифт. Муаллифони лоиҳаи Қонуни Ҷумҳурии Тоҷикистон «Дар бораи ангишт» умедворанд, ки таҳия ва қабули қонуни мазкур дар мувофиқа бо стандартҳои байналмилалӣ ва санадҳои ҳуқуқии байналмилалӣ, ки Тоҷикистон онҳоро эътироф намудааст, метавонад барои ҷалби сармояи дохилию хориҷӣ ва рушди соҳаи истихроҷу истифодаи ангишт заминаи боэътимод гузорад. Инчунин, қабули қонуни мазкур имконият медиҳад, ки саноати ангишт дар кишвар рушд ёбад.