Вохӯрӣ бо намояндагони СММ

Душанбе, 10 феврал. (АМИТ «Ховар», Дилшодаи Хайруллоҳ). – 9 феврали соли 2012 дар бинои Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон мулоқоти дуҷонибаи раиси Кумита бо мудири кишварии Бунёди аҳолии Созмони Миллали Муттаҳид Карл Кулесса ва мудири минтақавии ин созмон Николай Ботев сурат гирифт. Дар нишаст доир ба масъалаҳои ҳамкориҳои дуҷониба, аз ҷумла доир ба рафти корҳои татбиқи лоиҳаҳои «Пешгирии БНМБ/БПНМ дар байни ҷавонони деҳот» ва «Рушди шабакаи YPEER дар Ҷумҳурии Тоҷикистон» таваҷҷӯҳ зоҳир гардид. Раиси Кумита Маликшо Неъматов перомуни рафти корҳо ва муваффақиятҳо дар ин лоиҳаҳо гузориши муфассал пешниҳод намуд. Ӯ зикр кард, ки барномаҳои амалишаванда барои паст намудани хавфи бемориҳои гузаранда, аз ҷумла БНМБ/БПНМ мусоидат намуда, барои заминагузории тарзи ҳаёти солим дар байни ҷавонон қадамҳои устувор мегузоранд.Дар доираи лоиҳаҳои мазкур як қатор чорабиниҳо перомуни баланд бардоштани сатҳи дониш ва малакаи ҷавонони деҳот таҳти шиори «Ҳамсол ба ҳамсол» гузаронида шуд. Ҳамзамон барои 40 нафар мутахассиси сохторҳои маҳаллии Кумита доир ба масъалаҳои баробарии гендерӣ омӯзиш доир гардид.Зикр гардид, ки масоили дастгирии ташаббусҳои маҳаллӣ аз ҷониби донорҳо ва ташкилотҳои байналмилалӣ ҳоло ҳам беҳбудӣ мехоҳанд. Дар соли ҷорӣ Кумита як қатор чорабиниҳоро бо Хазинаи нуфузи Созмони Миллали Муттаҳид дар робита бо масоили рӯзмарраи ҷавонон ба нақша гирифта аст.Ҷаноби Николай Ботаев иброз намуд, ки мо низ аз татбиқи ин лоиҳаҳо қаноатманд ҳастем ва дар оянда барои мустаҳкам намудани усули ҳамкориҳои «Ҳамсол ба ҳамсол» дар байни ҷавонони деҳот талош хоҳем намуд. Дар ҳошияи ин суханон Карл Кулесса пешниҳод намуд, ки Шабакаи амалкунандаи Y-PEER фаъолияташро ҷоннок карда ва ба марказҳои иттилоотии ҷавонон бевосита пайваст шавад. Ин имкон медиҳад, ки захираҳои ҷавонон дар корҳои манфиатнок барои ҷомеа бештар истифода гарданд. Дар оянда дастгириҳо тавассути чунин лоиҳаҳо ба ҷавонони деҳот боз ҳам бештар хоҳанд шуд.