Дастовардҳои олимони тоҷик

Душанбе, 16 март.(АМИТ «Ховар», Марзия Саидова).-Муассисаҳои илмии Академияи илмҳои ҷумҳурӣ дар соли сипаригардида аз рӯи 71 мавзӯи илмиву таҳқиқотии бунёдӣ, 30 мавзӯи амалӣ ва 6 барномаи давлатӣ таҳқиқот гузарониданд, зикр шуд дар маҷлиси умумии солонаи Академияи илмҳои ҷумҳурӣ 16 март дар шаҳри Душанбе. Мамадшо Илолов, президенти Академияи илмҳои ҷумҳурӣ доир ба натиҷаҳои асосии илмии муассисаҳои илмии АИ ҶТ ҳисобот дода, зикр кард, ки фаъолияти АИ ҶТ тибқи «Стратегияи Ҷумҳурии Тоҷикистон дар соҳаи илм ва технология барои солҳои 2011-2015» ба роҳ монда шуда, ҷиҳати рушди муассисаҳои илмии кишвар, ҳамоҳангсозии корҳои илмию таҳқиқотӣ, ислоҳот дар Академия ива такмили сохтории муассисаҳои илмӣ, омоданамоии кадрҳои баландихтисос ба роҳ монда шудааст. Бо мақсади гузаштан ба роҳи инноватсионии рушди илм, истифодаи самараноки коркардҳои технологӣ ва ихтироот, татбиқи онҳо дар истеҳсолот дар сохтори АИ ҶТ «Маркази рушди инноватсионии илм ва технологияҳои нав» таъсис дода шудааст. Инчунин ҷиҳати мусоидат дар таҳия ва ба нашр омода намудани «Атласи миллии Тоҷикистон» ва гузаронидани таҳқиқоти ҷуғрофӣ дар АИ ҶТ шӯъбаи ҷуғрофия таъсис дода шуд. Мавриди зикр аст, ки соли 2011-ум 60-солагии АИ ҶТ дар сатҳи баланд бо иштироки Президенти ҷумҳурӣ Эмомалӣ Раҳмон баргузор гардид. Дар маҷлиси тантанавии ҷашнӣ дар радифи донишмандони тоҷик инчунин 30 меҳмони хориҷӣ аз 10 муассисаи илмии кишварҳои дунё ширкат варзиданд.