Хати нави оби нӯшокӣ
Суғд, 9 март. (АМИТ «Ховар», Мирзалӣ Амонов).-Бо дастгирии мақомоти иҷроияи ҳокимияти давлатии ноҳияи Мастчоҳ ва саҳми соҳибкор, сарвари хоҷагии деҳқонии «Ғузни Калон» Аброр Зиёвуддинов сокинони мавзеи Фирдавсии ҷамоати деҳоти Оббурдон бо оби тозаи ошомиданӣ таъмин шуданд. Барои бунёди хати оби нӯшокии 8 километра аз мавзеи Навобод то маҳаллаи Фирдавсӣ аз буҷаи маҳаллӣ 100 ҳазор сомонӣ маблағ ҷудо гашт. Як қисми корҳо бо маблағи соҳибкор Аброр Зиёвуддинов ва ҳашари аҳли хоҷагӣ ба сомон расид. Дар ҳар мавзеи маҳалла шумораи лозимии ҷойҳои обгирӣ аз хати оби нӯшокӣ сохта шуд. Сарчашмаи об ду чоҳи амудӣ ва ҳавзу манораи обҷамъкунии мавзеи Навобод буда, кашидани хати оби нӯшокии тоза боиси ҳалли мушкилоти сокинон гардид.