Имзои шартномаҳои суғуртавӣ кам шуд

Душанбе, 14 март. (АМИТ «Ховар», Лаззат Диловарзод).- Бино ба маълумоти Агентии омори назди Президенти ҶТ дар қаламрави ҷумҳурӣ 14 ширкати суғуртавии иҷозатномадошта амал мекунад, ки дутои он ширкати давлатӣ ва 12 –тояш ғайри давлатӣ мебошад.Аз рӯи ҷамъбасти оморие, ки ширкатҳои суғуртавӣ дар соли 2011 пешниҳод кардаанд, маблағи барномавии ин ширкатҳо 30 млн. 672 ҳазор сомониро ташкил додааст. Маблағи аъзоҳаққии суғуртавӣ 91 млн. 993 ҳазор ва пардохти суғурта дар соли 2011 14 млн.127 ҳазор сомониро ташкил додааст.Ба иттилои манбаъ, дар соли 2011 бо ширкатҳои суғуртавӣ ҳамагӣ 1 млн. 848 ҳазору 320 нафар ашхоси ҳуқуқӣ ва инфиродӣ шартнома имзо намудаанд, ки нисбат ба соли 2010 2,8 фоиз кам аст. Аз шартномаҳои имзошуда 71,4 фоизаш суғуртаи ихтиёрӣ буда, 28,6 фоизи боқимонда суғуртаи ҳатмӣ мебошад. Дар шароити имрӯза ширкатҳоро зарур аст, ки миқдори шартномаҳои суғуртаи ихтиёриро зиёд намуда, пардохти саривақтии суғуртаро ба зарардидагон таъмин намоянд.