Кӯмакпулӣ ба хонумони фаррош

Душанбе, 5 март. (АМИТ «Ховар», Марзия Саидова).- Ба ифтихори Рӯзи модар ва ҷашни Наврӯз раиси шаҳри Душанбе Маҳмадсаид Убайдуллоев аз фонди захиравии худ 1 миллиону 192 ҳазор сомонӣ барои дастгирии занони табақаҳои гуногуни пойтахт, хусусан хонумони фаррош, ки дар тозагию ободонии пойтахт заҳмати зиёд мекашанд, кӯмакпулии яквақтаина ҷудо намуд. Ин тадбир бо назардошти саҳми арзандаю иштироки фаъолонаи занон дар рушди соҳаҳои иқтисодию иҷтимоӣ ва ободонии пойтахт андешида шудааст. Дар асоси қарори марбутаи раиси шаҳр ба 2285 зани фаррош, 19 нафар собиқадори меҳнат, 20 нафар фаъолзани пойтахт, 60 нафар зан-корманди дастгоҳи Раиси шаҳри Душанбе ва сохторҳои мақомоти шаҳрӣ ба ҳар кадоме 500 сомонӣ кӯмакпулии яквақтаина расонида мешавад.