Омодагӣ ба мавсими кирмакпарварӣ

Душанбе, 6 март. (АМИТ «Ховар», Дилшодаи Хайруллоҳ).-Ҷиҳати муташаккилона гузаронидани мавсими кирмакпарварӣ корхонаҳои Вазорати энергетика ва саноати Ҷумҳурии Тоҷикистон, аз ҷумла КВД «Пилла», корхонаҳои фаръии тухми кирмаки шаҳрҳои Душанбею Хуҷанд ва корхонаи фаръии зотпарварии тухми кирмаки шаҳри Ваҳдат нақшаи чорабиниҳоро таҳия намуданд. Бояд тазаккур дод, ки ҳамаи ноҳияҳои кирмакпарвар ба сармоягузорон вобаста карда шудаанд. Сармоягузорон ҶДММ «Дук», ҶДММ «Дӯстии Афғонистон», ҶДММ «ВТ Силк»- шаҳри Хуҷанд, ҶДММ «ВТ Роҳи Абрешим», ҶДММ «Дӯстии Н.Р», КВД «Пилла», КФ «Сарбанд силк»-и шаҳри Сарбанд, КФ «ВТ Силк» шаҳри Кӯлоб, ҶДММ «Хуҷанд Атлас» ва ҶДММ «ВЧ Пилла»-и ноҳияи Данғара тибқи нақша кирмакпарваронро бо тухми кирмаки хушсифат, маводи лозимӣ ва бо маблағи зарурӣ таъмин хоҳад кард. Тухми кирмаке, ки дар корхонаҳои фаръӣ тайёр карда мешавад, барои аз бемории пебрина эмин будану муайян намудани фоизи зиндашавии тухмӣ зарур аст. Дар ин бобат бо иштироки мутахассисони соҳа комиссияи назорати давлатӣ таъсис дода ва аз назорат гузаронида мешавад. Дар ин бора ба мухбири АМИТ «Ховар» аз котиботи Вазорати энергетика ва саноат иттилоъ доданд.