Тарғиби хизмати ҳатмии ҳарбӣ

Душанбе, 16 март. (АМИТ «Ховар», Лаззат Диловарзод).- Дар ҷамоатҳои деҳоти «Симиганҷ» ва «Чӯянгарон» -и шаҳри Ваҳдат тарғиби даъват ба сафи Қувваҳои Мусаллаҳи Ҷумҳурии Тоҷикистон оғоз ёфт,- иброз дошт раиси ҷамоати деҳоти «Симиганҷ» Аҳмад Шамсов ба мухбири АМИТ «Ховар». Ба кори тарғибу ташвиқи даъватшавандагон ба хизмати аскарӣ кормандони ҷамоати деҳот, муаллимон ва раисони маҳаллаҳо ҷалб шудаанд.Ба гуфти А. Шамсов, дар даъвати гузашта дар байни ҷамоатҳои шаҳри Ваҳдат аввалин шуда ҷамоати «Симиганҷ» таъмини аскарбачаҳоро ба сафи Қувваҳои Мусаллаҳ анҷом дода буд. Дар даъвати навбатӣ ҳам умедворем, ки тавассути тарғибу ташвиқ аз ӯҳдаи ин вазифаи муқаддас баромада тавонем,- афзуд раис. Ёдовар мешавем, ки фармони Президенти ҷумҳурӣ «Дар бораи ба эҳтиёт рухсат додани хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд ва даъвати навбатии шаҳрвандони Ҷумҳурии Тоҷикистон солҳои таваллуди 1985 – 1994 ба хизмати ҳарбӣ» ба имзо расид. Мутобиқи фармон хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд, моҳҳои апрел – майи соли 2012 аз сафи Қувваҳои Мусаллаҳи Тоҷикистон, қӯшунҳои сарҳадӣ, Гвардияи миллӣ, қӯшунҳои дохилии Вазорати корҳои дохилӣ, қӯшунҳои мудофиаи гражданӣ ва бригадаи посбоникунандаи Сарраёсати иҷрои ҷазои ҷиноятии Вазорати адлия ба эҳтиёт рухсат дода мешаванд.