Тепловозҳои Қазоқистон дар Душанбе

Душанбе, 1 март. (АМИТ «Ховар», Людмила Дубинина). – 28 феврал як миқдор тепловозҳои сохти Қазоқистон ба шаҳри Душанбе оварда ва ба Муассисаи воҳиди давлатии «Роҳи оҳан» — и Тоҷикистон расман супурда шуд. Мувофиқи қарордоде, ки бо дастгирии муассисаҳои молиявии рушд ва содироти Ҷумҳурии Қазоқистон имзо шудааст, дар давоми як моҳ ба Тоҷикистон овардани боз 4 тепловоз дар назар аст. Сафири Қазоқистон дар ҶТ Оғибой Смагулов зимни суханрониаш зикр намуд, ки ҳоло беш аз садҳо адад чунин локомотивҳои нав дар роҳҳои оҳани Қазоқистон ҳаракат мекунанд.Муовини вазири нақлиёти Ҷумҳурии Тоҷикистон Худоёр Худоёров дар навбати худ иброз дошт, ки роҳбарияти кишвар ба рушди системаи нақлиёт таваҷҷӯҳи хоса медиҳад. Мавсуф ба Ҳукумати Қазоқистон барои дастгирии доимӣ ва сари вақт ба Тоҷикистон фиристодани тепловозҳои нав изҳори миннатдорӣ кард.